Ir al contenido
Resultados de la búsqueda para: Manuel Antonio
Este volume, que recolle a obra en prosa de Manuel Antonio, forma parte dun proxecto conxunto entre a Real Academia Galega e a Fundación Barrié e permitirá, por fi n, a publicación da obra completa do escritor rianxeiro. O devandito proxecto inaugura tamén unha nova colección, con vocación de futuro, que se denominará Clásicos da Academia. Co título de Prosa literaria agrupamos un total de quince títulos que recollen os textos de creación literaria, todos eles narrativos, inéditos na sua maior parte
A fascinación desatada pola figura de Manoel Antonio converteuno en autor moito máis admirado do que lido. Non sorprende: cos textos de vangarda, as características da súa linguaxe fan necesario un traballo de explicación e análise para o lector poder realizar con eles un triplo proceso: ler, sentir e pensar. Non outra cousa significa a lectura, cabalmente entendida. A orixinalidade deste volume consiste en facer accesíbel, intelixíbel e apaixonante un texto que arrastra unha infeliz reputación de difícil, até tornar evidente por que De catro a catro constitúe unha das obras maiores da vangarda peninsular no S. XX. A tal fin, son percorridos os dezanove poemas do libro e esa obstinada circunnavegación é complementada con achegas de carácter máis ensaístico para arredondar a interpretación e permitir un xogo de ida e volta entre a análise dos textos e a reflexión sobre o literario galego, o lugar nel de Manoel Antonio, ou a sutil forma en que vampiriza a estética das vangardas históricas. Por tanto, este libro querería ser útil para os amantes da literatura, os profesionais do ensino, os investigadores e, en xeral, todos os que queiran viaxar até o ámago da experiencia literaria en que o rianxeiro esgotou a súa vida para nos deixar un legado de inconmensurábel abertura.
